საიტის მუშაობს სატესტო რეჟიმში

სიახლეები

ბეჭდვა

ლევან დავითაშვილმა ბრაკონიერებისგან დაჭრილი გარემოსდაცვითი ზედამხედველობის დეპარტამენტის კახეთის რეგიონული სამმართველოს უფროსი ბესიკ შუბითიძე საავადმყოფოში მოინახულა



გარემოს დაცვისა და სოფლის მეურნეობის მინისტრმა ლევან დავითაშვილმა, გარემოსდაცვითი ზედამხედველობის დეპარტამენტის კახეთის რეგიონული სამმართველოს უფროსი ბესიკ შუბითიძე საავადმყოფოში მოინახულა, რომელიც 22 მარტს გურჯაანში, სამსახურებრივი მოვალეობის შესრულების დროს ბრაკონიერებმა დაჭრეს.

ბესიკ შუბითიძე სამოქმედო ტერიტორიის გეგმიური შემოვლის დროს, მდინარე ალაზანზე, ბრაკონიერებმა სანადირო თოფიდან გასროლის შედეგად დაჭრეს. პაციენტს სხეულის მრავლობითი ცეცხლსასროლი იარაღით მიყენებული ჭრილობები აღენიშნება, მისი ჯანმრთელობის მდგომარეობა ამ ეტაპზე სტაბილურია და აგრძელებს მკურნალობას. 

ბესიკ შუბითიძის ჯანმრთელობის მდგომარეობას ლევან დავითაშვილთან ერთად, მისი მოადგილე - იური ნოზაძე და გარემოსდაცვითი ზედამხედველობის დეპარტამენტის ხელმძღვანელი პირები ადგილზე გაეცნენ.

"ყველაზე მნიშვნელოვანია, რომ ჩვენი თანამშრომლის მდგომარეობა, დამაკმაყოფილებელია. ის სამედიცინო დაკვირვების ქვეშ არის და დიდი იმედი გვაქვს, რომ მალე გამოკეთდება. უნდა აღვნიშნო, რომ ბრაკონიერებთან ბრძოლა ჩვენი სამსახურების მიერ იქნება პრინციპული, მთელი საქართველოს ტერიტორიაზე." - განაცხადა ლევან დავითაშვილმა. 

მომხდარზე გამოძიება მიმდინარეობს სისხლის სამართლის კოდექსის 353-ე პრიმა მუხლის მეორე ნაწილით. აღნიშნული მუხლი გულისხმობს ხელისუფლების წარმომადგენლის ჯანმრთელობის ხელყოფას მის სამსახურებრივ საქმიანობასთან დაკავშირებით. დანაშაული ისჯება თავისუფლების აღკვეთით ვადით შვიდიდან თერთმეტ წლამდე.

ყველა სიახლე
შემოგვიერთდით: