სიახლეები
გარემოსდაცვითი ზედამხედველობის დეპარტამენტის თანამშრომლებმა 8 უკანონო სახერხი საამქრო გამოავლინეს
გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის თანამშრომლებმა, 8 უკანონო სახერხი საამქრო გამოავლინეს.
არარეგისტრირებული, უმეტესად ლენტური ტიპის სახერხი საამქროები მოქალაქეებს, იმერეთში, აჭარაში, შიდა ქართლში, კახეთსა და სამეგრელოში, საკარმიდამო ეზოებში ან სპეციალურად მოწყობილ შენობებში ჰქონდათ განთავსებული.
3 უკანონო სახერხი საამქრო გამოვლენილია სამეგრელო-ზემო სვანეთის რეგიონული სამმართველოს თანამშრომლების მიერ მარტვილისა და აბაშის მუნიციპალიტეტებში. სოფლებში - დობერაზენსა და ინჩხურში, მოქალაქეებს, ლენტური ტიპის დაურეგისტრირებელი სახერხი საამქროების ტერიტორიებზე, განთავსებული ჰქონდათ უკანონოდ მოპოვებული წიწვოვანი სახეობის 11 ერთეული მრგვალი ხე-ტყე (მორი), წაბლის სახეობის 4 ერთეული მორი და 0,8 კუბური მეტრი მოცულობის პირველადი გადამუშავების პროდუქტი (ფიცარი). სოფელ ნოხაში კი, მოქალაქეს, ცირკული ტიპის სახერხი დანადგარი, საკარმიდამო ეზოში ჰქონდა დამონტაჟებული.
თითო-თითო სამართალდარღვევაა გამოვლენილი კახეთის, აღმოსავლეთის, დასავლეთისა და აჭარისა და გურიის რეგიონული სამმართველოს თანამშრომლების მიერ ახმეტის, ხელვაჩაურისა და ხაშურის მუნიციპალიტეტებში. ასევე - ქალაქ ქუთაისში, სადაც სამართალდამრღვევს, სახერხი საამქროს ტერიტორიაზე უკანონოდ მოპოვებული 0.7 კუბური მეტრი მოცულობის წიწვოვანი სახეობის ფიცარიც ჰქონდა განთავსებული.
1 უკანონო სახერხი საამქრო გამოავლინეს გარემოსდაცვითი პატრულირებისა და სწრაფი რეაგირების სამსახურის თანამშრომლებმაც. საგარეჯოს მუნიციპალიტეტის სოფელ სასადილოში, მოქალაქეს ლენტური ტიპის არარეგისტრირებული სახერხი საამქროს ტერიტორიაზე 3 კუბური მეტრი მოცულობის პირველადი გადამუშავების პროდუქტი (ფიცარი) და 1 კუბური მეტრი მოცულობის „ნაგვერდულიც“ ჰქონდა განთავსებული.
ვინაიდან ფაქტები შეიცავს სისხლის სამართლის დანაშაულის ნიშნებს, მასალები შემდგომი რეაგირების მიზნით, შესაბამის უწყებებში გადაიგზავნა.
