სიახლეები
აჭარაში სასარგებლო წიაღისეულის უკანონო მოპოვების 5 ფაქტი გამოავლინეს
გარემოსდაცვითი ზედამხედველობის დეპარტამენტის აჭარისა და გურიის რეგიონული სამმართველოს თანამშრომლებმა აჭარაში სასარგებლო წიაღისეულის უკანონო მოპოვების 5 ფაქტი გამოავლინეს.
შუახევის მუნიციპალიტეტის სოფელ ხიჭაურში, მდინარე აჭარისწყლის კალაპოტთან მოქალაქემ, სპეციალური ტექნიკის საშუალებით, 20 კუბური მეტრი ქვიშა-ხრეში მოიპოვა.
ქედის მუნიციპალიტეტის სოფელ პირველ მაისში, მდინარე აჭარისწყალზე კი, სამართალდამრღვევის მიერ, 90 კუბური მეტრი ქვიშა-ხრეშია უკანონოდ მოპოვებული.
სასარგებლო წიაღისეულის უკანონო მოპოვების 3 ფაქტია გამოვლენილი ქალაქ ბათუმში, მდინარე ჭოროხზე. მოქალაქეებმა, სპეციალური ტექნიკით, ჯამში 1 150 კუბური მეტრი ქვიშა ხრეში უკანონოდ მოიპოვეს.
აჭარისა და გურიის რეგიონული სამმართველოს თანამშრომლებმა სამართალდამრღვევების მიმართ ადმინისტრაციული სამართალდარღვევების შესახებ ოქმები შეადგინეს.
